ШҚО-да тұрғын үй секторында өрт саны 15% - ға төмендеді

Шығыс Қазақстан облысы Төтенше жағдайлар департаменті 13 292 тұрғын үй секторларын аралап, нәтижесінде 2 941 үйде 4 182 өрт қауіпсіздігі талаптарын бұзу анықталды. Бұл туралы Өңірлік коммуникациялар қызметінің брифингінде ШҚО ТЖД Мемлекеттік өрт бақылау басқармасының бастығы Нұржан Өміржанов мәлімдеді.

- Біз тұрғын үй секторында өрттердің алдын алу бойынша кең ауқымды жұмыс жүргізудеміз. Тұрғындар арасында рейдтер, акциялар, нұсқаулықтар және тұрғын үйлерді аралау 2021 жылмен салыстырғанда өрт санын 15% - ға азайтуға мүмкіндік берді, - деді Нұржан Өміржанов, биыл өрттер кезінде балалар өліміне жол берілмегенін атап өтіп.

Сондай-ақ, ол облыс аумағында пешпен жылытылатын 3 174 үй тіркелгенін, онда азаматтардың әлеуметтік осал санаты тұратынын айтты.

-Қазіргі уақытта Департамент ЖАО-мен бірлесіп осы адресаттарды 100% үй-үйді аралап шықты. Жоғарыда аталған үйлерде 2 357 бұзушылық анықталды. Оның ішінде: 1 613 пешпен жылытумен байланысты, 573 - электр желілері мен электр жабдықтарын пайдалануына байланысты, 171 өзге де бұзушылықтар санатына жатады, - деді спикер.

Сонымен қатар, оның ақпараты бойынша, өңір аумағында жеке тұрғын үй секторында айналма жолдар қайта жанданды.

- Меморандум аясында "Қазмырыш" ЖШС 2 140 улы газ датчигін, Катонқарағай ауданының әкімдігіне 200 датчикті бөлді. Олардың барлығы қалалар мен аудандарға бөлінген. Суық түскенге дейін орнатылады,- деді ШҚО ТЖД МӨҚБ бастығы.